|
 Pilipinas, isang bansa na marami ang humahanga dahil sa mga taglay nitong kagandahan. Ngunit dahil sa mga masasama at halu-halong motibo ng mga pulitiko sa gobyerno, unti-unti nitong hinahatak ang ekonomiya ng Pilipinas pababa. Ano nga ba ang solusyon sa mga problemang ito? Tanging ang pagbabalik-loob sa Diyos ang susi tungo sa kaunlaran.
Bakit pagbabalik-loob sa Diyos? Una, pinagpapala ng Diyos ang bayang pinararangalan Siya. Nakasaad sa Awit 33:12,“Mapalad ang bansa na ang Diyos ay ang Panginoon.” Itinakda ng Diyos na lahat ng bansa at ang mga tao rito ay mahalin at kilalanin Siya bilang Panginoon, kung saan ang Diyos ay tunay at lubos na nagagalak. Pangalawa, ang Diyos ang may kapangyarihang humatol sa lahat ng nakapailalim sa Kaniyang kaluwalhatian. Mababasa rin sa Biblia mula sa kasaysayan ng Israel kung paano hinahatulan ng Diyos ang iba’t ibang bansa - pagpapala o pagpaparusa man. Ang lahat ng ito ay nagpapatunay at nagpapakita na ang Diyos ang tagapaghusga sa buong mundo, kasama na rin ang Pilipinas. Pangatlo, sa kabila ng lahat ng kasalanan na ginawa sa Kanya ng buong mundo, Siya ay isa pa ring Diyos na maawain, at nagbubukas ng pintuan para sa pagbabago. Ang mga ito ang dahilan kung bakit pagbabalik-loob sa Diyos ang tanging paraan tungo sa kaunlaran.
 Papaano magbalik-loob sa Diyos? Nakasaad sa II Cronica 7:14, “Kung ang aking bayan na tinatawag sa pamamagitan ng aking pangalan ay mapagkumbaba at dumalangin, at hanapin ang aking mukha, at talikuran ang kanilang masamang mga lakad; akin ngang didinggin sa langit, at ipapatawad ko ang kanilang kasalanan, at pagagalingin ko ang kanilang lupain.” Una, kailangang magpagtantuan at aminin ng lahat ng Pilipino na sila ay nagkasala sa Diyos. Sa pagkakaunawang ito, kailangang sumunod ang desisyon na gawin ang lahat ng makabubuti sa bansa, mahirap man, na hindi lumalabag sa kalooban ng Diyos. Hindi nagtatapos ang lahat sa desisyon, kailangan din na ang lahat ng ito ay malagyan ng aksyon. Sa pagbabalik-loob sa Diyos, dapat ay mga Kristyano ang manguna at maging mabuting halimbawa sa lahat. Ang pagpapanauli ng katuwiran at katarungan ay isa ring sangkap sa pagbabalik-loob sa Diyos. Nakasulat sa Awit 97:2, “…katuwiran at kahatulan ay patibayin ng kaniyang luklukan.” Kaya kung magkakaroon ng katuwiran at katarungan sa Pilipinas, maghahari ang Panginoon. Ang isa pang halimbawa upang mapatunayan na kailangan ang katuwiran at hustisya ay nakasaad sa Kawikaan 14:34, “Ang katuwiran ay nagbubunyi ng bansa: ngunit ang kasalanan ay kakutyaan sa alinmang bansa.” Ang huli at ang pinakamahalaga sa lahat ay dapat malaman at kilalanin ng lahat ng Pilipino na ang Diyos ang tanging daan para sa muling pag-unlad ng Pilipinas. Ang lahat ng ito ay paraan upang magbalik-loob sa Diyos.
 Ano ang magiging bunga ng pagbabalik-loob sa Diyos? Unang-una, ito ang magdudulot ng kagalingan sa bayan mula sa pagkalunod nito sa kahirapan at kasalanan. Pangalawa, ang mapagpalang kamay ng Panginoon ay muling hihipo sa Pilipinas at ang biyaya na nagmumula sa Kanya ay muling mag-uumapaw, hindi lamang sa Kanyang mga anak, kundi pati na rin sa buong Pilipinas, tulad rin ng nakasaad sa Kawikaan 10:22, “Ang pagpapala ng Panginoon ay nagpapayaman.” Ang tunay na kalayaan at kaunlaran ay makakamtan ng Pilipinas kung lahat ng Pilipino ay magbabalik-loob sa Diyos.
Totoo nga! Tanging pagbabalik-loob sa Diyos ang susi tungo sa kaunlaran dahil Siya ay maawain at mahal niya ang lahat ng Kanyang nilikha. Ang tanging paraan upang magbalik-loob sa Diyos ay pagsisisi at pagkakaroon ng katuwiran at katarungan. Bibiyayaan ng Panginoon at magkakaroon ng tunay na kalayaan ang bayan kung magbabalik-loob ang lahat. Kaya’t magbalik-loob na sa Diyos at nang maging maunlad muli ang bansang Pilipinas.
By Randy M. Valdez
Randy M. Valdez is a student of Jesus’ Flock Academy in Marikina City. This essay was written as an entry for the Filipino Essay Writing Category in the 14th School of Tomorrow National Student Convention.
Photos courtesy of Dan Cercado. You may visit his website at dcercado.tk.
|
